मनामधूनी निर्झर वाहे, अशी लिहावी गझल
हृदयी अंकुर उमलुन यावे, तशी फुलावी गझल
आर्त भावना झिरपत यावी, लयीत अल्लद सहज
चौकटीतले चित्र सजावे, तशी दिसावी गझल
भाळावरच्या सौभाग्यासम हरेक अक्षर सजव
पायी पैंजण छनछनवावे, तशी हसावी गझल!
मनात जपलेली आवडती जुनी सुगंधी जखम
डोळ्यातिल सुकलेले पाणी, तशी रुजावी गझल
एका एका शब्दाने तू अंबर सारे उजळ
क्षितिजकडांनी झळकुन जावे अशी जमावी गझल
वैशाखाच्या जाळामध्ये वसंत मनिचा फुलव
प्राजक्ताने मुग्ध करावे अशी जगावी गझल
....रसप....
२२ मे २०१२
No comments:
Post a Comment
Please do write your name.
आपलं नाव नक्की लिहा!