नवा रंग माझ्या घराला दिला
नसे आवडीचा, तरी का दिला?
कुणाला विचारायचा जाब मी ?
घरातील सगळेच माझेच की !
नवा गंध छातीत मी ओढला
अनावर उसळला जुना खोकला
जरा थांबलो, शांत झालो जरा
जपूनच पुन्हा श्वास मी घेतला
सवय लागली हीच नकळत मला
हळू अन् जपुन श्वास घेतो अता
.
.
घराच्या पुढे एक चाफा असे
सवे डोलणारा कडूनिंबही
हसू रानफूलातले गोडसे
मधूनच दिसे अन् मधूनच लपे
धडाडून बुलडोझराला तिथे
कुणी निर्दयाने फिरवले असे
न चाफा तिथे ना कडूनिंबही
फुलांची चिरडली मुकी आसवे
.
.
इथे वास येतो विचित्रच अता
नवा रंग अन् झाडप्रेतांतला
इथे ह्या घरी मी जरी जन्मलो
उद्या ह्याच मातीत संपीनही
तरीही मला वेगळे वाटते
कसे वाटते, काय सांगायचे ?
.
.
.
.
.
.
....रसप...
१७ डिसेंबर २०१९
