घर वृंदावन गोकुळ

घर वृंदावन गोकुळ
घर पवित्रतम देउळ
घर मायेचा पाझर
घर अथांग सागरतळ

दुनियेचा भूलभुलैया
दररोजच शोधा रस्ता
काट्यांची पाउलसोबत
वळणावळणावर खस्ता
घर मिळता मिळता होते
गहिवरली संध्याकाळ
.... घर वृंदावन गोकुळ
.... घर पवित्रतम देउळ

आकाश कुंड अग्नीचे
झळ सोसेना डोळ्यांना
मृगजळ चाळवते तृष्णा
भेगा-चटके पायांना
घर निवांत शीतल छाया
भवताली रणरण माळ
.... घर वृंदावन गोकुळ
.... घर पवित्रतम देउळ

क्षितिजाहुन क्षितिजापाशी
मी शोध घेतला ज्याचा
तो कधी मिळाला नाही
मग ठाव लागला त्याचा
घर माझे आलय त्याचे
हृदयातुन वाजे टाळ
.... घर वृंदावन गोकुळ
.... घर पवित्रतम देउळ

....रसप....
९ एप्रिल २०१३