संपलो.. संपून उरलो तर ?
जिंकलो मी, मीच हरलो तर ?
वाटते भीती मला माझी
मी खरोखर मीच असलो तर ?
ह्याच रस्त्याने पुढे गेलो
ह्याच रस्त्याने परतलो तर ?
नेहमी बाबाच असतो की !
एकदा आई समजलो तर ?
खूप भक्ती चांगली नाही
मी तुझी मूर्तीच बनलो तर ?
जीवनाची धून आठवली
नेमके शब्दच विसरलो तर ?
आतला अंधार आवडतो
पण असा अव्यक्त विझलो तर ?
झोप आता यायची नाही
मी मला स्वप्नात दिसलो तर ?
भेटलो असतो तुलासुद्धा
आरश्यातुन आत शिरलो तर
हा दिवस सरला. बरे झाले
जर उद्या नाही उगवलो तर ?
....रसप....
०८ ऑगस्ट २०२५
No comments:
Post a Comment
Please do write your name.
आपलं नाव नक्की लिहा!