भावनांचा अंतराशी दाबतो उद्रेक मी

अंतरातच भावनांचा दाबतो उद्रेक मी
विझविण्या ती आग अश्रू सांडतो कित्येक मी

धुंद झाल्यावर ठरवतो 'सोडले आता तिला'
सांजवेळी रोज असतो एक ती अन् एक मी

संपला पेला तरीही कंठ आहे कोरडा
आज अश्रू एकही ना चाखला बहुतेक मी

लोकशाहीतील राजे खूप झाले आजवर
तप्त रक्ताचे अनन्वित पाहिले अभिषेक मी

चेहरा खोटा न माझा वाटतो कोणासही
सभ्यतेच्या नाटकाचा बोलका अतिरेक मी

कोण तू माझा, तुझा मी कोण आहे विठ्ठला ?
मागण्यांच्या पूर्ततेपुरताच आहे नेक मी

....रसप....
११ एप्रिल २०१३