उधार सारे फिटेल नक्की
तुझे तुलाही मिळेल नक्की
नसेल प्राजक्त अंगणी पण
जुनी जखम दरवळेल नक्की
म्हणे निसर्गच हसून छद्मी -
'फुलास काटा छळेल नक्की!!'
भकास झाली जमीन आता
नभास पान्हा फुटेल नक्की
अजूनही वाटते मला की
दुरूनही ती बघेल नक्की
जिथे जिथे तू, तिथे तिथे मी
कधी तरी जाणवेल नक्की
'जितू', मंदिरी कशास जाऊ ?
मिळेल तितके पुरेल नक्की !
....रसप....
७ फेब्रुवारी २०१३
No comments:
Post a Comment
Please do write your name.
आपलं नाव नक्की लिहा!