प्रोफाईल

ती नाहीये.. माहितेय..
पण मला तिच्या प्रोफाईलला फ्रेंड म्हणून ॲड करायचंय
ती काहीच बोलणार नाहीये, लिहिणार नाहीये
मला माहितेय
पण मला तिच्या शांततेला 'लाईक' करायचंय
ती येणार नाही.. माहितेय..
पण तरी मला तिला माझ्या आवडत्या ग्रुपमध्ये गुपचूप जोडायचंय
ती कुठेच दिसणार नाहीये
हेही माहितेय
पण मला तिच्या जुन्या फोटोत तिलाच टॅग करायचंय

बघू तरी काय होतं..
तेव्हा तिने बोलणं बंद केलं होतं
तिच्या अबोल्याने अतोनात छळलं होतं
माझ्याकडे बघणंही कटाक्षाने टाळलं होतं
अगदी सहजपणे आयुष्यातून गाळलं होतं

आता ती मला 'ब्लॉक' तरी नक्कीच करू शकणार नाही
प्रोफाईलचे दरवाजे लॉक तरी नक्कीच करू शकणार नाही
कारण ती नाहीये..
..माहितेय....

तिचं नाव, तिचा फोटो...
पण प्रोफाईल खरं तर माझी आहे!
आणि आता ती राजी आहे..
फेक असली तरी माझी आहे..

....रसप....
१८ मार्च २०१२