माझी हो ना

हसता हसता उगाच लाडिक रुसण्यासाठी माझी हो ना
रुसता रुसता खुदकन गाली हसण्यासाठी माझी हो ना

हात तुझा मी हाती घेता तू नाजुक लाजाळू व्हावे
मिठीत माझ्या कळीसारखे खुलण्यासाठी माझी हो ना

गंध तुझा लेऊन सरावी रात रोज अन पहाट व्हावी
ओठावरचा थेंब दवाचा बनण्यासाठी माझी हो ना

रेशिम रेशिम मल्मल मल्मल स्पर्श तुझा तो हवाहवासा
मोरपिसाचा लुब्ध शहारा उठण्यासाठी माझी हो ना

कर्पुरकांतीवरती सारे रंग खुलूनी तुझ्या दिसावे
जीवनास ह्या रंगसफेती करण्यासाठी माझी हो ना

मधुर तुझ्या ओठांची चव माझ्या ओठांवर तरळत यावी
जवळी नसता भास बनूनी छळण्यासाठी माझी हो ना

रूक्ष कोरडा रखरखता मी मनात माझ्या माळ मोकळा
हळवी रिमझिम करून थोडे भिजण्यासाठी माझी हो ना

सरता सरता आयुष्याचे होउन जाइल मखमल केशर
थरथरणारा हात कापरा धरण्यासाठी माझी हो ना

टप्प्या-टप्प्यावरती येथे आयुष्याशी भांडुन थकलो
माझ्यासोबत उभी राहुनी लढण्यासाठी माझी हो ना

....रसप....
९ मार्च २०१२