ढिम्म

सभोवताली सगळं वाहतं आहे
वेळ, हवा, रस्ता, माणसं..
हो, माणसंसुद्धा वाहतीच आहेत
त्यांना प्रवाहपतितही म्हणता येऊ शकेल
सगळं सगळं वाहतं.. आणि मी स्थिर.
'ढिम्म'ही म्हणता येऊ शकेल
मी ह्या सगळ्या प्रवाहाच्या मध्येच.. एखाद्या बेटाप्रमाणे
बहुतेक अशी अनेक बेटं आहेत
माझ्याच आजूबाजूला.. समोर..
आणि हे जमिनीचे तुकडेही वाहतेच आहेत, हा माझ्या नजरेला होणारा आभास

मी उभ्या जागूनच जरा निरखून पाहतो

बेटं...
बहुतांश निर्जन वाटत आहेत
कारण त्यांच्या अस्तित्वात काही हालचालच दिसत नाही
एखाद्या निपचित शून्यासारखी दिसत आहेत

मीही असाच निर्जन आहे का ?
नक्कीच नाही !
कारण मला व्यवस्थित जाणवत आहे
माझ्यामधल्या रहिवासी श्वापदांच्या झुंडींचं अस्तित्व
नेमकं कोणत्या श्वापदाने नेता व्हावं
हा निर्णय होण्यासाठी बराच काळ एक तुंबळ हाणामारी चालली आहे
माझ्या आत

ह्या एका अनिर्णितावस्थेत म्हणूनच मी निश्चल आहे
'ढिम्म'ही म्हणता येऊ शकेल
..... आणि सभोवताली सगळं वाहतं आहे
वेळ, हवा, रस्ता, माणसं..
हो, माणसंसुद्धा वाहतीच आहेत त्यांना प्रवाहपतितही म्हणता येऊ शकेल

....रसप....
२४ ऑक्टोबर २०१५