पुन्हा..

मना पसारा तुझ्यातला आवरू पुन्हा
तिच्या स्मृतींचे नवे सोहळे करू पुन्हा

कुणास आहे उगाच इच्छा जगायची
दिवा विझावा तसे मुक्याने सरू पुन्हा

उसंत नाही मला जराही टिपायला
नकोस डोळ्यामधून दु:खा झरू पुन्हा

तुझ्या मनाला विचार आधी तुझेच तू
जुन्या गुन्ह्यांची शिळीच चर्चा करू पुन्हा ?

निमूट साऱ्या जबाबदाऱ्या निभावल्या
मला कुणी ना म्हणे "तुला सावरू पुन्हा !"

मिळे न माया कुठेच जेव्हा खरीखुरी
फिरून येते घराकडे लेकरू पुन्हा

....रसप....
१० मे २०१२