रस्ता खराब आहे..

आता इथून पुढचा रस्ता खराब आहे
जावे जपून पुढचा रस्ता खराब आहे

आतापर्यंत माझा खडतर प्रवास नव्हता
वळणावरून पुढचा रस्ता खराब आहे

मुक्काम दूर आहे, हातात हात दे तू
मित्रा, अजून पुढचा रस्ता खराब आहे

यंदाहि पीक माझे पाण्याविना जळाले
जातो मरून पुढचा रस्ता खराब आहे

लग्नाकडून केली होती किती अपेक्षा

आले कळून पुढचा रस्ता खराब आहे

आयुष्य वेचले मी करण्या सुखी 'उद्या'ला
गेलो थकून पुढचा रस्ता खराब आहे

निवडून आणले ह्या 'कोल्ह्या'स मी खुशीने
म्हणतो हसून, "पुढचा रस्ता खराब आहे!"

....रसप....
३ मे २०१२