अप्सरा

रात ही सुगंध वाटुनी सरे हळूहळू
चांदणे तुझ्या कुशीत पाझरे हळूहळू

गोडवा तुझा नसेच अमृतातही सखे
आज वेदना मनात ओसरे हळूहळू

तू नको बघू तिथे पहाट सांडली तरी
मी प्रकाशुनी तुझ्यात थरथरे हळूहळू

काळही जरी इथे समोर आज ठाकला
पाहुनी तुला भरेल कापरे हळूहळू

वेचुनी तुझेच श्वास मालती सुवासली
हासती तुला बघून मोगरे हळूहळू

बंध तोडलेत आज मी समाज सोडला
वाटती रितीरिवाज बोचरे हळूहळू

'जीत' शब्द शोधतो तुझ्या स्तुतीस अप्सरे
गंडले रदीफ-काफिया खरे हळूहळू


....रसप....
१६ जून २०११