तुझा दोष नाही (पहिलं प्रेम....चौथीमधलं - २)

ती असायची शाळेत म्हणून
मला शाळेची आवड होती
विज्ञान-गणित-इंग्रजीची पुस्तकं
मी फक्त पाहिली होती

मनातल्या मनात तिला मी
हजारदा ’लव्ह यू’ म्हटलं
लिहू नाही शकलो कधी
स्पेलिंग नाही जमलं

अनेक वर्षांनंतर आज
पुन्हा तिला स्मरतोय
वारंवार तिचं नाव
ऑर्कुटवरती शोधतोय

मला माहित आहे ती
मला ओळखणार नाही
एव्हढंच फक्त म्हणीन हसून
"तुझा दोष नाही

तुला सगळं सांगण्यासारखं
ते वयसुद्धा नव्हतं
मनातल्या मनात बोललेलं
कधी ऐकू थोडीच येतं?"


....रसप...
१ फेब्रुवारी २०११

पहिलं प्रेम - चौथीमधलं - १ 

पहिलं प्रेम - चौथीमधलं - ३