वाहवा

काफिया चुकला तरी म्हणतात ते शेरास वाह्वा
जाहलो वेडा तरी म्हणतात ते प्रेमास वाह्वा

'वाट चुकणे' पावलांचा नेहमीचा छंद झाला
एकटा पडलो तरी म्हणतात ते वेगास वाह्वा

आजतागायत मला ना भेटला सज्जन कुणीही
भ्रष्टही झाला तरी म्हणतात ते देशास वाह्वा

जाळ त्या नजरेत होता झेलली जी आवडीने
राख मी झालो तरी म्हणतात ते तेजास वाह्वा

तत्वं माझी राखली मी अन पहा झालो भिकारी
फाटले कपडे तरी म्हणतात ते वेषास  वाह्वा

लाभण्या स्वातंत्र्य कोणी खर्चले प्राणास अपुल्या
त्याग तो वाया तरी म्हणतात ते वेडास वाह्वा

स्वप्न झाले भंग नामुष्कीसही घेऊन आले
संघ तो हरला तरी म्हणतात ते एकास वाह्वा

....रसप....
२० डिसेंबर २०११