ते राजे औरच होते..

ते राजे औरच होते जे जगले लढण्यासाठी
आता खुर्च्या खुर्च्यांशी लढतात 'कमवण्या'साठी

जिकडे तिकडे ज्ञानाचा धंदा करण्याला बसले
येणार कसा विद्यार्थी प्रामाणिक शिकण्यासाठी ?

जमवून घोळके म्हणती "अवतार मीच देवाचा!"
ते भोंदू ना कामाचे धर्माला जपण्यासाठी

व्रतबंध सोहळा झाला, खुंटीस जानवे त्याचे
शहरात  पुरोहित शोधे, पूजेस सांगण्यासाठी !  

नुसत्याच चाचण्या करती, आजारच समजत नाही!
वैद्यांचे डॉक्टर झाले तुंबड्यांस भरण्यासाठी

वर्षानुवर्षं त्यालाही नवसांची सवयच झाली
आता ना फुरसत त्याला दु:खाला हरण्यासाठी....


....रसप....
१२ डिसेंबर २०११