ह्या पहाटेच्याच वेळी रोज माझी रात होते

आठवांची आठवांशी भेट आवेगात होते
ह्या पहाटेच्याच वेळी रोज माझी रात होते


दो घडीचा खेळ माझा मांडला रंगून येथे
हारणेही जिंकल्याच्या खास आवेशात होते


वाचले होते कधी तू सांग डोळ्यातील माझ्या
बोललो तर वाटते की ही फुकाची बात होते ?


संपला हकनाक तू देशावरी ह्या भेकडांच्या
ती स्मृती प्राणार्पणाची साजरी गावात होते  


जे कधी जमलेच नाही तेच करणे भाग झाले
सत्य झाकावे किती जे समजणे ओघात होते


ध्वस्त झाले सर्व काही वेचतो अवशेष आता
वाटले जे झुळुकवारे तेच झंझावात होते


भोगले ऐश्वर्य ज्याने पाहिला तो खंगलेला
हाल कुत्रे खाइना त्याचे असे हालात होते


मैफली होऊन गेल्या पण अशी झालीच नाही
ऐकणारे सोबतीने भैरवी ही गात होते 


चूक झाली हीच माझी ठेवला विश्वास 'जीतू'
दावले ते वेगळे हे चावण्याचे दात होते


....रसप....
१२ ऑक्टोबर २०११