Tuesday, April 10, 2012

माणसे


आपल्या छबीसही न एकनिष्ठ माणसे
आरश्यासमोर वाटतात शिष्ट माणसे

आयता मिळेल तो न सोडती छदामही
ओरबाडणेच जाणतात भ्रष्ट माणसे

सांगती जनांस की "मला पहा, फुले वहा!"
देव जाहला कनिष्ठ अन वरिष्ठ माणसे !

वित्त साठवूनही नसे निवांत चित्त का ?
आपल्या घरात वाटती भ्रमिष्ट माणसे..

आजच्या सुखात दु:ख घोळतात कालचे
जीवनास आपल्या करून क्लिष्ट माणसे

जंगलात कायदा असे तसाच पाळती
राहिलीत फक्त श्वापदेच, नष्ट माणसे

जोडशील तू 'जितू' कितीक मित्र-सोयरे
सोडती चितेपर्यंत ती 'विशिष्ट' माणसे

....रसप....
१० एप्रिल २०१२

Monday, April 09, 2012

आज मला मुक्त करा


तुमच्यातुन आज मला मुक्त करा
माझ्यातुन आज मला मुक्त करा

मीच नसे लायक ते प्रेम नको
हृदयातुन आज मला मुक्त करा

शब्द थिटे सूर खुजे ताल चुके
गझलांतुन आज मला मुक्त करा

मी केल्या पापांना मोजू द्या
पुण्यातुन आज मला मुक्त करा

भवताली हिरवळ मी पसरवतो
काट्यातुन आज मला मुक्त करा

प्रामाणिक मी माझ्या छायेशी
नात्यातुन आज मला मुक्त करा

हातावर नशिबाला मी लिहितो
भोगातुन आज मला मुक्त करा

'जीतू' ना रमला ह्या मंचावर
नाट्यातुन आज मला मुक्त करा


....रसप....
३ एप्रिल २०१२

कविताविश्व अशी जगावी गझल विशेषांक''


मराठी कविता समुहाच्या ''अशी जगावी गझल'' वर आधारित ''कविताविश्व अशी जगावी गझल विशेषांक'' आपणासमोर सादर करत आहोत. हा अंक मेल मधे मिळवण्यासाठी mkebooks@marathi-kavita.com या पत्त्यावर मेल करा.

आताच्या आता हा अंक डाऊनलोड करण्यासाठी खालील दुव्यावर टिचकी लावा
http://www.marathi-kavita.com/sites/default/files/ebookpdfs/Kavita-Wishva-Ashi-Jagavi-Gazal-Part1-8-4-2012.pdf


हा अंक कसा वाटला आम्हाला mkebooks@marathi-kavita.com या पत्त्यावर नक्की सांगा, किंवा तुम्ही mkmoderators@gmail.com इथे पण तुमचे अभिप्राय पाठवू शकता. हा अंक आवडल्यास आपल्या मित्रांना पाठवायला विसरू नका. लाईक करा शेयर करा.

Sunday, April 08, 2012

ती इंग्लिश बोलते 'व्हॉट' अन 'व्हाय'


ती इंग्लिश बोलते 'व्हॉट' अन 'व्हाय'
पण मला जराही समजत नाय!

मी दिसतो काळा जरा बावळा
शहरी पोरांहून वेगळा
चष्मे, गॉगल, उंची कपडे
स्मार्टफोन अन गळ्यात टाय
मी मऱ्हाटमोळा साधा ब्वाय
ती इंग्लिश बोलते 'व्हॉट' अन 'व्हाय'
पण मला जराही समजत नाय!

शेतावर माझ्या मी रमतो
मित्रांशी गल्लाही जमतो
उगाच आलो शहराला ह्या
धावपळीने मी दमतो
तिला पाहुनी फक्त एकदा
दूर उडूनी थकवा जाय
पण....
ती इंग्लिश बोलते 'व्हॉट' अन 'व्हाय'
अन मला जराही समजत नाय!

मी पोरींशी ना कधी बोललो
'हलो-हाय' मी नुकते शिकलो
नाव सांगतो कसेबसे
ती माझ्यावर जोरात हसे
प्रेमाची भाषा 'ग्लोबल' नाय
ती इंग्लिश बोलते 'व्हॉट' अन 'व्हाय'
पण मला जराही समजत नाय!

कपास फुलते गालावरती
डोळ्यामधुनी कालवे झरती
चवळीची ती शेंग कोवळी
कधी वाटते तिख्खट मिरची
खळखळणारी मंजुळ वाणी
ऐकून मी तर गुंगून जाय
माझ्या मनचे बोलू काय?
मला जराही समजत नाय!
ती इंग्लिश बोलते 'व्हॉट' अन 'व्हाय'!

....रसप....
८ एप्रिल २०१२
Related Posts Plugin for WordPress, Blogger...