चित्रपट कविता क्र. ६: "दीवार" (भाग २)

विजय वर्मा (सिनेमात अमिताभ) च्या नजरेतून....

झालो कुबेर मोठा आतून रंक आहे
मी एकटाच येथे माझ्या जगात आहे

वा-यासवेच मीही वाटेवरी बहकलो
मागे फिरून येणे आता अशक्य आहे

आहेच पातकांचा माझा घडा भरूनी
भागी तयात नाही माझीच फक्त आहे

दगडात देव आहे म्हणतात लोक सारे
प्रत्येक घाव त्याचा माझाच भोग आहे

रक्तास, आसवांना, स्वेदास आटवूनी
माझी हयात गेली अंतास ओढ आहे

आलो तुझ्याच शरणी नाराज तू नसावे
तू सांग तेच आई करणार आज आहे


- ....रसप....
४ नोव्हेंबर २०१०

("मराठी कविता" ह्या ऑर्कुट समुहाच्या "ओळीवरून कविता" ह्या उपक्रमासाठी केलेली रचना)