Monday, October 18, 2010

मूक मी नसे

बोलतो जरी शब्द मोजके
वाचशी न का नेत्र बोलके

माझिया मनी तूच राहते
सांग का असे हेच थोडके?

इश्क का कधी सिद्ध होतसे
सोड सोड हा हट्ट लाडके

दोष हा स्वभावीच मूळचा
बोलणे इथे अल्प सारखे

मूक मी नसे चूक तू नसे
व्यर्थ हे तुला प्रेम जाळते


....रसप....
१८ ऑक्टोबर २०१०

Tuesday, September 28, 2010

गानप्रवासी

दु:ख व्हावे लुप्त तैसा भास होऊ दे
मैत्रभावे जीवना तू आज गाऊ दे

वाट माझी तापलेली थंड सावली
पोळलेल्या पावलांनी ताल देउ दे

घे उशाशी अंध आशा नीज येतसे
एकदा घटकाभरी तू श्वास घेऊ दे

मी प्रवासी दक्षिणेला संथ चाललो
गुप्त माझ्या ऒळखीला शब्द देऊ दे



....रसप....
२८ सप्टेंबर २०१०

Sunday, June 27, 2010

पावसाळा

खिडकीतून फांदी तुला
वाकून पाहते का गं?
टपटप थेंबांत तुझं नाव
ऐकू येतं का गं?

स्वच्छ चिंब भिजरा रस्ता
माझ्या घरचा का गं?
फेसाळलेला सागर तुला
नाराज वाटतो का गं?

रिमझिम पाऊस गालांवरती
स्पर्श माझा का गं?
निथळणारे कपडे जणू
माझी मिठी का गं?

अंगावरची शिरशिरी ती
पहिली भेट का गं?
पावसानंतर गार हवा
माझी चाहुल का गं?

दिवसा ढवळ्या काळोख होणं
माझं रुसणं का गं?
स्तब्ध ओघळणारा पिंपळ
माझं असणं का गं?

खळखळ ओढ्यासारखं माझं
निघून जाणं का गं?
जवळ आल्या क्षितिजासारखं
तुझं जगणं का गं?

दर वर्षी पावसाळा
असाच असतो का गं?
कधी उन्हाळा कधी हिवाळा
मनात दाटतो का गं?


….रसप….
२४ जून २०१०

Wednesday, April 21, 2010

भाग पूर्ण - बाकी शून्य

भाग पूर्ण - बाकी शून्य, सरळसरळ गणित
आयुष्याची गोळाबेरीज काहीच नव्हतं फलित

वाट चालता जिथे चालली तसातसा मी गेलो
साथ लाभता जशी मिळाली प्रत्येक वेळी रमलो
कुठे चाललो, काय साधले; कुणास होते माहीत
....... आयुष्याची गोळाबेरीज काहीच नव्हतं फलित

कधी ऐकता उदोउदो मी झाडावरती चढलो
वाळून गेल्या पानासारखा अलगद खाली पडलो
वा-यासंगे होणार होती, फरफटसुद्धा झालीच
....... आयुष्याची गोळाबेरीज काहीच नव्हतं फलित

झोकून देऊन प्रेम केलं, सारं काही ओतलं
सारं काही मला मिळालं, प्रेम तेव्हढं राहिलं
झुरलो नाही, कुढलो नाही, शिकलो नाही काहीच
....... आयुष्याची गोळाबेरीज काहीच नव्हतं फलित

दु:खाला मी खोदून खोदून खोल गाडून टाकलं
आनंदाला बाजाराला नेऊन नेऊन विकलं
आज उभा मी विकण्यासाठी, ग्राहक नाही कुणीच..
....... आयुष्याची गोळाबेरीज काहीच नव्हतं फलित


....रसप....
२० एप्रिल २०१०
Related Posts Plugin for WordPress, Blogger...