लेणी नैराश्याची

आभाळावर लेणी नैराश्याची

दमट कुंद अंधार दिवसभर गळतो

निरर्थकाचे चक्रव्यूह भवताली

उदासवाणा सुन्नपणा सळसळतो

उच्छ्वासांनी घट्ट बांधले श्वास

घनराखाडी सावट  अनिश्चिताचे

प्राणाशी घुटमळतो आहे काळ

अंतरात शिंतोडे अंधाराचे

उलटे पाउल पडते क्षणा-क्षणाचे

पुन्हा पुन्हा एकच हतबलता जगतो

तिरस्कृताची नजर कुणाला द्यावी

आरश्यातला डोळे मिटून असतो

मर्त्य जिवाची अविरत कुत्तरओढ

आयुष्याला शिक्षा आयुष्याची

उगाच छातीमध्ये रटाळ घरघर

आभाळावर लेणी नैराश्याची

....रसप....

१७ ऑगस्ट २०२० ते ०९ सप्टेंबर २०२०