Saturday, September 01, 2012

कासावीस


दिस सरला सरला, असे वाटता उरला
एक क्षण धारदार, गळ्यावरून फिरला
जीव करी तडफड, हृदयात धडधड
क्षण रुतून राहिला, सुटण्याची धडपड

गेलं घरटं सोडून, एक पाखरू उडून
कुठल्याश्या दूरदेशी, साऱ्या धाग्यांना तोडून
तिथे दिवस सुखात, इथे जातो काळोखात
रोज आणखी गडद, मन रंगते दु:खात

काळ आता तरी यावा, जीव एकदाचा जावा
किती वाटले तरीही, माझा अपुराच धावा
एक क्षण कासावीस, रोज धरतो ओलीस
क्षण एकेक पुढचा, होतो घटिका चोवीस

कमजोर खांद्यावर जीवनाचा वाढे भार
पाय लटपट होती, कसा धरावा मी धीर ?
तुला जाणवत नाही, असे मानवत नाही
देवा उदासीनता ही मला साहवत नाही

सोडवितो श्वासगाठी माझ्या मीच मुक्तीसाठी
आता थांबणार नाही देवा तुझ्या दयेसाठी
आज क्षण धारदार जावो उरी आरपार
लख्ख दिवस काळोखी व्हावा निपचित गार

....रसप....
१ सप्टेंबर २०१२

Thursday, August 30, 2012

आज पुन्हा उशीर झाला.. (गुड नाईट, स्वीट ड्रीम्स!)


आज पुन्हा उशीर झाला..
'लौकर येतो' सांगूनही
आणि तुझे डोळे भरले
बरंच काही सांडूनही..

काळ्याभोर डोळ्यांचं डबडबणं
मला थबथबलेल्या चिंचेच्या झाडामधून
डोकावणाऱ्या झाकोळलेल्या चंद्रासारखं वाटतं
आणि आत्ताच बरसून रितं झालेलं आभाळ
फिरून पुन्हा एकदा
माझ्या डोळ्यांत दाटतं....

तुला माहितेय..
मला रडता येत नाही..
म्हणून मी सगळं हसण्यावारी नेतो...
तुझी शप्पथ राणी,
पुढच्या वेळी नक्की लौकर येतो..

तू चिडू नकोस
कारण तू चिडलीस की तूच रडतेस
मला झाकोळलेला चंद्र
पाहवत नाही..
आणि भरल्या डोळ्यांनी नीट
'गुड नाईट, स्वीट ड्रीम्स'
पण म्हणवत नाही !

....रसप....
२९ ऑगस्ट २०१२
गुड नाईट, स्वीट ड्रीम्स !!  

Sunday, August 26, 2012

निरोप द्यावा.... (श्रद्धांजली - ए. के. हनगल R.I.P. A K Hangal)


किती जणांनी समोर माझ्या
अर्ध्यावरती डाव सोडला
अखेरच्या वळणावरती मी
परिस्थितीचा घाव सोसला

मीच अडकलो घरात माझ्या
धडपड केली सुटकेसाठी
मदतीच्या हातांनी माझे
श्वास वाढले घटिकेसाठी

सर्वाधिक वजनाचे ओझे
कुठले असते खांद्यावरती ?
मीच जाणले - 'आयुष्यच ते'
श्वासामागुन श्वास वाढती..!

दुर्दैवी अन खडतर जीवन
कधीच नव्हते नको वाटले
झळा वर्तमानाच्या लागुन
पाणी डोळ्यांतले आटले

अखेर झाली माझी सुटका
शेवटचा हा सलाम घ्यावा
धडपडणारा कलाकार मी
मंचावरुनी निरोप द्यावा....


....रसप....
२६ ऑगस्ट २०१२
श्रद्धांजली - ए. के. हनगल


रोजची रात्र अशीच असते.. (गुड नाईट, स्वीट ड्रीम्स !!)

तापलेल्या मातीत
पहिल्या पावसाचा पहिला थेंब पडल्यावर
झटक्यासरशी आसमंत व्यापणाऱ्या मृद्गंधासारखी
संध्याकाळ गडद होत जाते आणि
दिवसभर वेगवेगळ्या छटा दाखवणारं आभाळ
एकच निकोप, निष्कलंक काळा रंग लेऊन
किंचित लाजऱ्या चंद्राला
माझ्या खिडकीजवळ
तुझा 'गुड नाईट, स्वीट ड्रीम्स'चा निरोप देण्यासाठी पाठवते....

रोजची रात्र अशीच असते..
किंचित रेंगाळलेली
तुझ्या आभासांचा सुगंध होऊन
निकोप दरवळलेली..

....रसप....
२५ ऑगस्ट २०१२

गुड नाईट, स्वीट ड्रीम्स !!  
Related Posts Plugin for WordPress, Blogger...